29 jul. 2016

El panderu cuadráu y la Mancomunidá train un fin de semana de fiesta a la comarca d'El Rebollal

La comarca d'El Rebollal güelvi a vestilsi de fiesta, esta vés pol mé el panderu cuadráu y la mancomunidá Alto Águeda (Altu Águeda).

Peñaparda jadi la su XVII Fiesta el Panderu Cuadráu. El viernis es la chalra alreol el panderu (19:00), jecha por Raúl Benito, cona compaña d'una muestra d'afotus jechas por Juana Andrés, y una de dibujus jechus por el pintol Carlos Medina. Dispués (20.30) se jadrá baili de sevillanas ena Praza. El sábadu habrá un pasacallis a la mañana (11:00) y unus tenderilis d'artesanía. A la tardi, será el festival con el Baili el Ofretoriu, el charru del grupu de Peñaparda y el grupu "Sedeiro", de Zamora. Se le dará el Panderu d'Honol al folclorista Joaquín Díaz. A la nochi, la fiesta terminará con el conciertu de "Gabriel Calvo y la Fabulosa Retahíla" (23:00).

La fiesta sigui en Payu, andi se jadrá la Fiesta la Mancomunidá. A la mañana s'abrirán los tenderilis d'artesanía. Seguirá a mañana con el folclori del grupu "Jálama" de Payu (12:30). Duranti tó'l día habrá una muestra de ganáu, otra de trajis de charru, otra d'afotus,... A las 14.30 será la comía populal. A la tardi, habrá juegus pa los dagalis (16:30). La fiesta acabará a última hora de la tardi, con e conciertu el grupu estremeñu "Manantial folk" (20:00).

Cartel Fiesta de la Mancomunidá

Cartel de la VII Fiesta el Panderu

Un cambión volcáu cuerta la carretera de Coria cerca de Perosín

El martis 26 de Juliu, un cambión cargáu d'alpacas se salió de la carretera ena curva el kilómetru 41, en yendu en direición Coria, mú cerca de Perosín, antis de llegal al Puertu Peralis, al láu la pista que va a Payu.
Cambión volcáu

El cambión queó volcáu a la orilla la carretera, y tuvun qu'ussalsi varias grúas p'enderedalu, de mó y manera que la carretera C-526, la que ui Ciarrodrigu y Coria, estuvu cuertá angunas horas.

AFOTU: Rubén Mateos Pascual

II Carrera por el Monti de Payu

El domingu 17 de Juliu de 2016 se jidu, en Payu, la II Xálima Trail (Carrera por el Monti).

Esti añu había tres mó y maneras de participal: corriendu 14 kilómetrus, corriendu (o andandu) 7 kilómetrus y la carrera en bici de montaña.

La carrera de los 14 kilómetrus, qu'está en drentru el circuitu de carreras de la Diputación de Salamanca, la ganó el correol James Moyben, de Kenia, del "C.D. La Armuña", con 54' 42" de tiempu total. En mujeris, la ganaora jué Verónica Sánchez, de "Atletas Veteranos", con un tiempu de 1h 03' 49".

Ena carrera de 7 kilómetrus ganarun, en hombris, Domingo José Luna (34' 29")y, en mujeris, Andrea Ramos (42' 57").

Salía de la carrera

Grupu de caminantis

NOTA: Afotu de la salía: José Manuel Pintado

Afotu de los caminantis: Verónica Mangas

16 jul. 2016

La Señora Isabel, de Peñaparda, jadi 100 añus

Isabel García, la Señora Isabel, jidu el pasáu 7 de Juliu 100 añus.
La Sra. Isabel tocandu pa'l discu
"El pandero cuadrado de Peñaparda"

Isabel García, del pueblu de Peñaparda, es bien conocía en tó'l lugal, pos antañu tuvu una taberna con el su hombri, el Señol Isidro. Es tamién conocía nel mundu del folclori por habel salíu en dos discus: "Antología de la Música tradicional Salmantina", dirigía por Ángel Carril (añu 1986, con tres sonis) y "El pandero cuadrado de Peñaparda" dirigíu por Gabriel Calvo (añu 2002, con una toná). Unu de los temas qu'ella grabó, el ajecháu "Cuando la zorra viene", es unu de los más versionáus por tólus grupus e intérpretis de música folk, entri ellus el grupu "Folk on Crest" o Eliseo Parra.

Asina, la Señora Isabel (100) entra ena lista de los centenarius de Peñaparda, lista en drentru la qu'están la Tia Gora (110), la Tia Lonisia (107), la Tia Anastasia (102) y el Tiu Miguel "Gatu" (102, entovía vivu).

NOTA: afotu arrecogía del discu "El Pandero cuadrado de Peñaparda"