29 sept. 2017

Los dagalis d'El Rebollal apencipian la escuela con una escuela de menus

El pasáu lunis 11 de Setiembri, apencipió la escuela pa tólus dagalis d'El Rebollal.
Escuelas de Villarrubias

Peru esti añu 2017 no es un añu cualquiera pa los nuestrus dagalis y las nuestras escuelas. Dispués de muchus añus, las escuelas de Villarrubias van a estal afechás por falta de dagalis. Y es que, además de no nacel dagalis enos nuestrus pueblus, los que van siendu un pocu más grandinus apencpian a il a escuela a Ciarrodrigu, conu que esti añu se queaban dos dagalis pa las escuelas de Villarrubias, lo que no llega al mínimu de cuatru pa dejal abiertas las escuelas.

Los dos dagalis de Villarrubias se han uñíu, esti añu, a los de las escuelas de Peñaparda, a cincu kilómetrus, tamién nel nuestru Rebollal.

24 sept. 2017

Santu Ferinu 2017

El pinu llegandu al lugal
El pueblu de Villarrubias jidu, a finalis el mes d'Agostu, las sus fiestas a Santu Ferinu (26 d'Agostu), el su patrón.

Además de los típicus incierrus, capeas, verbenas y la misa al santu, las tradicionis vinun pol mé el conciertu de Vanesa Muela y, sobri tó, pol mé el pinu que tólus añus ponin los quintus. No faltó, tampocu, la paella que se jidu nel Riufríu.

Aquí vos deju angunas afotus de las fiestas de Santu Ferinu d'esti añu 2017.

Conciertu de Vanesa Muela

Paella


El pinu los quintus

Incierru a caballu









Capea con novillerus



















NOTA: afotus de pinu, incierru y capea emprestás por Rubén Mateos

15 sept. 2017

Las bicis jidun la su "fiesta" en Peñaparda

Las callis de Peñaparda se golvierun a enllenal de bicis el pasáu domingu, 13 d'Agostu del 2017.

Y es qu'esi domingu se jidu, con principiu y fin en Peñaparda, la VIII carrera de bicis "La Villa", jecha por el equipu de bicis del lugal, el C.D. El Charaíl.

Esperandu la salía
Los alreol de 60 correoris salierun dendi la Praza Mayol y, en corriendu los caminus d'El Rebollal y alreoris, golvierun a llegal al puntu d'andi salierun, la mesma Praza de Peñaparda. Los bicicristas pudun escogel entri dos recorríus, unu cortu (33 km) y otru largu (43 km).

El cuerti de la cinta ena salía lo jidu esti añu José Benito Mateos, "TXEBE", tamborileru del lugal (o sea, esti que vos escribi estas rayinas).


Bicicristas polas callis de Peñaparda

13 sept. 2017

Payu bailó con el su festival folclóricu

El pueblu de Payu jidu, el juevis 3 d'Agostu, el su festival folclóricu "La Sartén Charra", organizáu por el grupu "Jálama", festival que jadi el númeru 7.
Praza de Payu

La fiesta apencipió con el pasacallis polas callis del lugal, jasta llegal a la Praza, andi estaban los tenderilis el mercáu d'artesanía.

Nel festival folclóricu estuvun, además del grupu "Jálama" de Payu, el grupu "Amanecer Extremeño" veníu dendi Moraleja (Cáciris) y una pareja de bailaoris de Salamanca, al son del tamboril de Berna Pérez. Tolus tamborilerus presentis subierun al tbráu, andi se le jidu un pequeñu homenaji al desaparecíu Jacinto, d'Alba del Yeltis, bien conocíu por tós ellus.
La Tia Juana, de Payu

El premiu homenaji, la "Sartén d'Honol" d'esti añu, jué para Juana Mateos, de 89 añus, una de las últimas mujeris d'El Rebollal en vestil al mó y manera tradicional, y que siempri ha estáu bailandu nel festival.

Ya a la nochi, la fiesta acabó con el conciertu el grupu folk "Baleo".

No podemus dejal de láu que esti añu, en un pasu más ena defensa de las tradicionis de la comarca, los cartelis el festival estaban escritus, además d'ena lengua oficial, ena nuestra palra d'El Rebollal.

Berna Pérez a la gaita y el tamboril



Grupu "Amanecer Extremeño"

Conciertu el grupu "Baleo"

12 sept. 2017

Día la Mancomunidá 2017

El domingu, 30 de Juliu, la "Mancomunidad Alto Águeda" (Mancomunidá Altu Águeda) jidu en Peñaparda el ya tradicional Día la Mancomunidá. Al sel siempri al sotru día de la Fiesta el Panderu, esti añu Peñaparda tuvu dos días seguíus de fiesta.
Tenderilis ena Calli Fontanilla

El Día la Mancomunidá apencipió cona chalra las autoriadis, comu Camila Vizarro (aldaldesa de Peñaparda), Julián Fandiño (presidenti de la Mancomunidá y alcaldi de Campillu) y Javier Iglesias (presidenti de la Diputación).

Adispués jué la muestra de folclori, que la jidu el grupu de Peñaparda, que jidu comu bailis el "ajecháu", el "salteáu", el "corríu brincáu" y el "ofretoriu".

El mercáu d'artesanía y la muestra de ganáu estuvun puestus tó'l día, los tenderilis polas callis del lugal y el ganáu ena cortina el caminu Payu. Además, estuvu abiertu el muséu y hubu una muestra d'afotus antiguas.

Tenderilis alreol del Charail del Rollu
Al meyudía tó'l que quiju pudu subil a las eras de las Majaíllas a comel una paella.

A la tardi tólus dagalis que quijjun se pudun montal nel tren que corrió las callis del pueblu, y hubu una muestra de magia por el magu Juan F. Luzón.

Tamién a la tardi, el Día la Mancomunidá acabó cona música y el folclori charrus del grupu "Enflautados".
Grupu "Enflautados"
Tren polas callis del lugal

6 sept. 2017

XVIII Fiesta el Panderu en Peñaparda

El pueblu de Peñaparda jidu, entri los días 28 y 29 de Juliu de 2017, la su Fiesta el Panderu, que esti añu a jechu la númeru 18.
Grupu folclóricu de Peñaparda con
Raúl Díaz de Dios

El viernis 28 jué la chalra alreol de rollus y picotas, jecha por el restauraol Cristian Berga. Dispués d'esa chalra, hubu sevillanas ena Praza, bailás polas que han estáu enos cursus que se han dáu ena comarca d'El Rebollal y alreoris.

El pratu prencipal de la Fiesta el Panderu jué el sábadu 29 de Juliu. Tóa la mañana hubu, ena Praza y alreoris, un mercáu d'artesanía. Ya a la tardi jué el pasacallis de tólus participantis y el festival folclóricu, que tuvu a estus grupus:
 - Grupu de dagalis de Peñaparda
 - Grupu "Las Ramajeras" (Las Jurdis)
 - Grupu "El Roble Charro" (Ciarrodrigu)
 - Grupu folclóricu de Peñaparda

Además, tamién a la tardi, se jidu "Socia d'honol" a la tia Juliana "Mansa", y se le dió el "Panderu d'honol" a Isabel Ramos González "Isabelita".

Ya a la nochi, la Fiesta el Panderu acabó con el conciertu d'acurdión de Raúl Díaz de Dios, que tuvu nel escenariu la compaña, además de la su banda, de los tamborilerus del lugal (comu esti qu'escribi estas rayinas), Gildo a las castañuelas y las dagalas con el panderu.


Sevillanas

Cartelinu ena palra d'El Rebollal

Tenderilis del mercáu

Ena metá, la tia Juliana "Mansa", socia d'honol

Grupu jurdanu "Las Ramajeras"

"Isabelita", panderu d'honol 2017

Grupo "El Roble Charro", Ciarrodrigu

Conciertu de Raúl Díaz de Dios

18 ago. 2017

Laura Ester Ramos gana otra medalla cona seleción de "watelpolu"

Laura Ester Ramos, conas sus raícis en Peñaparda, ganó el pasáu mes de Juliu la medalla de prata enos mundialis de nadal que se jidun en Budapest (Hungría).
Laura Ester nel partíu

Laura juegó, el viernis 28 de Juliu, la final del "watelpolu" femeninu cona seleción española, andi juega comu portera. El partíu final, entri España y los Estáus Uñíus, acabó con el resultáu de 13 - 6 a favol el equipu americanu, que jué el que se llevó la medalla d'oru.

Dispués de lo lográu, y comu vieni jadiendu dendi chiquinina, Laura pasó unus días de las sus vacancias en Peñaparda, andi se l'han veníu jadiendu homenajis estus añus d'atrás (las piscinas mesmu de Peñaparda llevan el su nombri). Esti añu no hi teníu noticia d'homaneji ninguna, asina que sirva esta pequeña noticia comu tal. ¡Noragüena, Laura!

NOTA: afotu jecha duranti el partíu, en RTVE

1 ago. 2017

Payu celebra esti 3 d'Agostu el su festival folclóricu

El pueblu de Payu celebra esti juevis 3 d'Agostu, el su festival folclóricu, organizáu por el grupu "Jálama". Va a sel la VII vés de la "Sartén Charra", que asina es el nombri que tieni esti festival.
Cartel de "La Sartén Charra",
tamién ena nuestra palra d'El Rebollal

El programa e ésti:

19:00   PASACALLIS de tamborilerus, dendi'l multiusus jasta la Praza

20:00   Actuacionis de los GRUPUS DE BAILI
     - Grupu "Amanecer Extremeño" (Moraleja, Cáciris)
     - Pareja de bailaoris de Salamanca
     - Grupu "Jálama" (Payu)

     Además, en drentru el festival, se dará la "Sartén d'Honol".

23:00   CONCIERTU del grupu folk "Baleo"

Pola tardi, a la mesma vés que los bailis, habrá ena praza un mercaíllu con tenderilis d'artesanía.

Tenemus de señalal  tamién qu'el cartel qu'anuncia el festival está escritu, además d'ena lengua oficial, ena nuestra palra d'El Rebollal, enanchandu asina la defensa de la cultura tradicional a la nuestra lengua.

25 jul. 2017

Peñaparda acabará el mes de Juliu con fiestas

El pueblu de Peñaparda va a tenel, entri'l viernis 28 jasta'l domingu 30, tres días de fiesta conos qu'el lugal va a despedil el mes de Juliu. Estus tres días de fiesta vienin pol mé de dos fiestas: la Fiesta el Panderu (días 28 y 29) y la Fiesta la Mancomunidá Altu Águeda (día 30).

FIESTA EL PANDERU 
Cartel de la Fiesta el Panderu


Viernis, 28 de Juliu

19:00   CHALRA alreol de "Rollus y picotas", por Cristian Berga, restauraol
20:00   SEVILLANAS


Sábadu, 29 de Juliu

11:00   FERIA d'artesanía
            ALBORÁ polus tamborilerus de la comarca
            MUESTRA de cómu se jadi un panderu, por Andrea Mateos

19:00   PASACALLIS
             FESTIVAL FOLCLÓRICU          
            - Grupu de dagalis de Peñaparda
            - Jadel "Socia d'honol" a la tia Juliana "Mansa"
            - Grupu "Las Ramajeras" (Las Jurdis)
            - Entrega del Panderu d'Honol a Isabel Ramos "Isabelita"
            - Grupu "El Roble Charro" (Ciarrodrigu)
            - Grupu folclóricu de Peñaparda

23:00   Conciertu de Raúl Díaz de Dios


FIESTA LA MANCOMUNIDÁ 
Cartel de la Fiesta de la Mancomunidá


Domingu, 30 de Juliu

12:00   Principiu de la XV Feria d'Artesanía y Negocius, y de la VIII Feria de Ganáu

12:15   Actuación del Grupu Folclóricu de Peñaparda, ena Praza Mayol

15:00   Comía pa tóa la genti enas piscinas

17:00   Magia, enas piscinas, por el magu Juan F. Luzón

20:30   Conciertu por el grupu "Enflautados"

Duranti tó'l día habrá varias muestras:
 - Muestra de Ganáu (caminu Payu)
 - Muséu etnográficu
 - Muestra d'afotus (centru cultural)
 - Muestra d'encaji de bolillus (Praza)
 - Muestra de cenderrus (corral en Calli Eras)

Pola tardi, dendi las 5 la tardi, habrá juegus pa los dagalis, con castillus jincháus y tren.

24 jul. 2017

La nuestra palra d'El Rebollal tendrá dineru pa la su defensa

La nuestra palra d'El Rebollal (el mó y manera que tenemus los rebollanus de palral la lengua leonesa) tendrá dineru pa la su defensa.
Cartel en la Calli l'Atriu, Robrea

Pol mé una enmienda de la UPL (Uñión el Pueblu Leonés), la nuestra palra d'El Rebollal tendrá dineru pa jadel material pa que puéa apriendelsi, lo mesmu ena escuela que juera d'ella. La enmienda del partíu leonesista jué aprobá a finalis el mes de Juniu enas Cortis de C. y León y, pol mé d'ella, serán 50.000 € (cincuenta mil eurus) los qu'iran pa que se puéa apriendel a palral la lengua leonesa enas crasis propias de las dos comarcas andi mejol se conserva: El Rebollal y Las Arribis, a los que se podrán añuil otrus 50.000 pa'l sotru añu.

Nel casu la nuestra comarca d'El Rebollal, el material tendrá comu basi el trabaju jechu por Ángel Iglesias Ovejero, natural de Robrea, autol de los prencipalis librus y estudius alreol de la nuestra palra d'El Rebollal: "El habla de El Rebollar. Descripción" y "El habla de El Rebollar. Léxico".

La propuesta nación en drentru el grupu CCRL (Ciudadanus el Reinu de León) que, pol mé la colaboración entri CCRL y UPL, acabó enas Cortis comu enmienda a los dinerus de la autonomía. D'esta propuesta palramus hai unas semanas en esta otra noticia: La palra d'El Rebollal, otra vés enas Cortis

21 jul. 2017

Afotus de las fiestas de San Silveriu y los Sanjuanis

Pinu de Peñaparda
Los pueblus d'Es Rebollal dierun la bienvenía al Veranu conas sus fiestas, San Silveriu (20 de Juniu) en Peñaparda y los Sanjuanis (24 de Juniu) en Navafrías, Payu y Robrea.

Además d'incierrus, capeas, verbenas, misas y procesionis, lo más mentáu juerun la muestra de pájarus en Peñaparda y el conciertu d'acurdión de Raúl Díaz de Dios en Navafrías. Lo más tradicional juerun los pinus en Peñaparda, Payu y Robrea, y los capazus de Payu y Navafrías.

Aquí vos deju anguns de las afotus que jidi estas fiestas.

Incierru en Peñaparda

Pinu de Payu
Pájarus en Peñaparda
Pinu en Robrea




Acurdionis en Navafrías
Raúl Díaz de Dios


Procesión de San Silveriu

16 jun. 2017

Los pueblus d'El Rebollal recibin al Veranu conas sus fiestas a San Silveriu y San Juan

Comu tólus añus, el calendariu natural y el calendariu de fiestas llegan uñíus pa que, n'estus tiempus, los pueblus d'El Rebollal den la bienvenía al Veranu.

Los primerus en dal la bienvenía al Veranu son los peñaparderus, honrandu a San Silveriu. Esti es el programa que han preparáu, en Peñaparda, p'apencipial bien el Veranu.
Poniendu la Viga en Payu
(afotu del añu 2016)

VIERNIS 16
20:00   Levantamientu del PINU polus quintus
23:00   VERBENA cona orquesta "HOLDEM"

SÁBADU 17
13:30   INCIERRU polas callis del lugal
18:00   CAPEA
23:00   VERBENA cona orquesta "MAX MUSIC SHOW"

DOMINGU 18
13:30   INCIERRU polas callis del lugal
18:00   CAPEA

LUNIS 19
16:00   JUEGUS pa los dagalis

MARTIS 20
12:00   MISA en honol a San Silveriu
13:00   INCIERRU pa los dagalis
19:00   Muestra de CETRERÍA (águilas y halconis)

Los otrus pueblus que celebran las sus fiestas, Navafrías, Payu y Robrea, lo jadin los mesmus días, viernis, sábadu y domingu, anque los navafrieñus tienin tamién el lunis juegus pa los dagalis. Éstu es lo que vamus a podel disfrutal enos Sanjuanis d'El Rebollal.

VIERNIS 23
20:00   Levantamientu del PINU polus quintus (ROBREA)
21:00   Levantamientu de la VIGA (PAYU)
23:00   CAPAZU (PAYU)
23:00   CAPAZU (NAVAFRÍAS)
23:30   VERBENA cona orquesta "TRÍO MUSICAL MARFIL" (PAYU)
23:30   VERBENA cona orquesta "DISCO TRÓPICO" (ROBREA)
00:30   DISCU-MÓVIL (NAVAFRÍAS)

SÁBADU 24
11:00   MISA en honol a San Juan (NAVAFRÍAS)
12:00   MISA en honol a San Juan (ROBREA)
12:00 a 14:00   JUEGUS pa los dagalis (ROBREA)
12:30   INCIERRU A CABALLU por el Práu la Jerraúra (NAVAFRÍAS)
13:00   INCIERRU polas callis del lugal (PAYU)
14:00   PAELLA pa tóa la genti (ROBREA)
15:00 a 17:00   JUEGUS pa los dagalis (ROBREA)
18:00   CAPEA, animá cona charanga "LA CLAVE" (NAVAFRÍAS)
18:30   CAPEA tradicional (PAYU)
18:30   CAPEA tradicional (ROBREA)
23:00   VERBENA cona orquesta "GRUPO SUMMER" (NAVAFRÍAS)
23:30   DISCU-MÓVIL (PAYU)
00:00   VERBENA cona "ORQUESTA SHOW" (ROBREA)

DOMINGU 25
11:00   MISA en honol a San Juan (PAYU)
12:00   INCIERRU A CABALLU (ROBREA)
12:30   INCIERRU A CABALLU por el Práu la Jerraúra (NAVAFRÍAS)
13:00   JUEGUS pa los dagalis (PAYU)
18:00   JORICIA conos novillerus de la Escuela Taurina de Salamanca MANUEL DIOSLEGUARDE y LEONARDO PASSAREIA. De seguíu, CAPEA tradicional (NAVAFRÍAS)
18:30   CAPEA tradicional (ROBREA)
23:00   CONCIERTU d'acurdión jechu por RAÚL DÍAZ DE DIOS (NAVAFRÍAS)

LUNIS 26
16:30   JUEGUS pa los dagalis (NAVAFRÍAS)

Un añu más, es curiosu que los pueblus d'El Rebollal, ricus en folclori, lo dejin de láu enas sus fiestas. Curiosu tamién que, en teniendu una lengua propia ena comarca d'El Rebollal, ningún pueblu  la ussi enos cartelis de las fiestas.

25 may. 2017

La palra d'El Rebollal, otra vés enas Cortis

Sieti añus dispués, la nuestra palra d'El Rebollal va a sel mentá enas Cortis de C. y León. Esta vés, pol mé una "enmienda" a los dinerus autonómicus.
Cartel ena palra d'El Rebollal, en Robrea

Pol mé'l acuerdu que han jechu el grupu CCRL (Ciudadanus el Reinu de Llión) y el partíu UPL (Uñión el Pueblu Llïonés), el procuraol enas Cortis por UPL, Luis Mariano Santos, ha presentáu una "enmienda" a los dinerus para que, d'ellus, 50.000 € (cincuenta mil eurus) sean dedicáus a jadel material pa que la genti aprienda las dos palras llïonesas que mejol se conservan ena provinca de Salamanca: la nuestra palra d'El Rebollal y la palra de Las Arribis. D'esti mó y manera, se jadrían librus, vídeus,... pa apriendel dambas dos palras cogiendu comu muestra los estudius de Ángel Iglesias Ovejero (pola palra d'El Rebollal) y Llorente Maldonado (pa la palra de Las Arribis).
Los 50.000 eurus se repartirían entri los materialis pa dambas dos comarcas, y habría otrus 50.000 pa'l sotru añu pa'l mesmu serviciu. Y es que, el podel apriendel dambas palras llïonesas enas escuelas con güen material es algu prencipal pa que puedan seguil vivas.

Asina, pol mé los dinerus de l'autonomía, la nuestra palra va a golvel a estal enas Cortis. Lejus quéa ya aquel 26 de Mayu del 2010 cuandu, pa la PNL (Proposición No de Lei) en defensa de la lengua llïonesa, el procuraol del PSOE (Partíu Socialista Obreru Español) José Ignacio Martín Benito (nacíu en La Encina) leyó una parti el poema "Jálama", escritu ena palra d'El Rebollal por José Benito Mateos Pascual.

24 may. 2017

Los caballus golvierun a Robrea pa la su Feria

El pueblu de Robrea golvió a jadel, y cona d'esti añu 2017 van ochu vedis, la su Feria el Caballu. Esta vés la jidun entri'l viernis 19 y el domingu 21 de Mayu.
Preparáus pa'l paséu a caballu

El viernis 19 se jidu una chalra alreol de los torus, que valió d'homenaji a los torerus José Miguel Pérez "Joselillo" y Eduardo Gallo.

Ya el sábadu 20 se desayunarun migas y, una vés cogías juerzas, se jidu una paséu a caballu jasta La Cascajera. Dispués de la comida pa tós, la feria se llevó jasta'l pabellón andi, además de cenal, se pudun vel sevillanas y, a la nochi, un conciertu de framencu con el grupu "Kurkillo".

Pa acabal, el domingu 21 se jidu una feria d'artesanía, una muestra d'afotus del mundu el toru, y se remató tó con sevillanas.

Sali d'oju que, en algu que se jadi ena nuestra comarca, no apareza ni la nuestra palra d'El Rebollal (ni enos cartelis, ni nel programa), y que se apuesti por el framencu y las sevillanas dejandu de láu lo charru. Un puntu a corregil pa'l sotru añu, en drentru de lo qu'es una güena idea.

14 may. 2017

Semana de rayus, truenus y aguarrás

La comarca d'El Rebollal ha teníu, en tólus pueblus, una semana de tormentas y mucha agua, que ha vemíu a abonal la sequeá que había en tóa la comarca.
Arcu del Señol en Peñaparda


Las tormentas apencipiarun el miércolis 10 de Mayu, sobri tó a la tardi. Antis de la tormenta se pudu vel un gran Arcu dobri sobri los cielus d'El Rebollal. Esa mesma tardi cayó una de las tormentas más grandis que se recuerdan. Pol mé d'ella, lo menus en Peñaparda estuvun al sotru día sin teléfonu enas cassas. Tamién en Peñaparda, cayerun dos rayus que, conos sus truenus, se barruntarun en tó'l lugal y jidu cimbreal tóas las cassas del pueblu de mó y manera apaecíu a un terremotu. Esi día, la estación de Navafrías arrecogió 35 l/m2 (litrus el metru cuadráu), cuasi tós dendi las 6 de la tardi.
Las callis jechas regatus

Las tormentas siguierun el juevis 11 de Mayu y, comu himus dichu más arriba, tuvun al pueblu de Peñaparda sin teléfonu tó'l día. Jué el día que más llovió, con 45 litrus el metru cuadráu.

Pa acabal la semana, el viernis 12 de Mayu las tormentas dejarun, sigún la estación de Navafrías, 32'2 l/m2.

Asina, n'El Rebollal s'arrecogierun en tres días 112'2 litrus el metru cuadráu, más o menus lo que tendría d'habel llovíu nel mes enteru.

NOTA: datus arrecogíus de AEMET (Agencia Estatal de Meteorología)

10 may. 2017

Las carreteras d'El Rebollal son noticia

Esti mes de Mayu las carreteras d'El Rebollal han síu noticia por motivus diferentis.

Apencipiamus con la nueva inauguración de la carretera entri Navafrías y Valverdi. Cuertá, p'arregrala, dendi'l 15 d'Agostu del añu 2016, ya está abierta pa'l que quiera ussala. El sábadu 6 de Mayu se jidu la nueva inauguración, ena qu'estuvun, además de angunus de los justicialis del lugal, Javier Iglesias (Presidenti de la Diputación de Salamanca) y Marcelino Cordero (diputáu comarcal).

Bachi a la entrá de Saúgu
Peol suerti tienin los vedinus de Robrea. El grupu "Ciudadanos del Reino de León" ("Ciudadanus el Reinu de León", CCRL) ha güeltu a denuncial el estáu de la carretera entri Robrea y Saúgu. Nel escritu de denuncia, el grupu mienta el estáu de la carretera comu horrorosu y criminal, idiendu además qu'el conducil porla mesma es apaecíu a jadel un "rally". Asina, dendi'l grupu de "Ciudadanus el Reinu de León" pidin a la Diputación de Salamanca qu'arregrin la carretera  antis de "que haiga de lamental algu gravi pol mé el horrorosu estáu nel qu'está hogañu".

N'estas afotus podemus vel cóu está la carretera entri Robrea y Saúgu.

Carretera Robrea Saúgu

Carretera Robrea-Saúgu (2)


17 abr. 2017

Robrea y Peñaparda ena Charrá de Ciarrodrigu 2017

"El Fandangu" de Robrea
La XXXVIII Charrá de Ciarrodrigu, el sábadu 15 d'Abril, ha síu especial pa los grupus d'El Rebollal. Y es que esti añu han síu dos los grupus d'El Rebollal que han estáu presentis: el grupu "El Fandangu", de Robrea, y el grupu folclóricu de Peñaparda. Digu que ha síu especial porque, cuasi siempri, es ná más un pueblu u otru el qu'está, y esti añu han estáu dambus dos juntus.

Dispués del pasacallis, los primerus rebollanus que subierun al tabráu juerun los robreanus de "El Fandangu". Las tres parejas bailarun, al son de la gaita y el tamboril de José María, tres bailis: "Jota de dos pasus", "El Son" y "El Fandangu".

Justu dispués bailó el grupu de Peñaparda, al son del panderu d'Isabel Ramos. Las dos parejas bailarun el "Ajecháu", el "Salteáu" y el "Corríu brincáu".

Bailaoris de Peñaparda
Además de los grupus d'El Rebollal estuvun tamién de otrus lugaris, comu Ciarrodrigu, la Sierra Francia o Las Arribis, y d'otras provincias comu Cáciris o Güelva. El premiáu esti añu cona "Encina Charra" jué Diego Vacas, bailaol de Vilvestri, que cogi asina el relevu a Isabel Ramos, panderera de Peñaparda, a la que le dierun el premiu ena Charrá del añu pasáu.